《省靚招牌五十年》

今日難得dayoff唔使返工，梗係善用下時間啦（hea）！食Tea時一掀開milk誌，見到太古廣場有個廣告展，對於我呢個廣告迷黎講，當然係天大既喜訊！跟住就唔理三七廿一飛奔去金鍾喇。
呢個廣告展係4As (the Association of Accredited Advertising Agents of Hong Kong)搞既，目的係回顧香港近５０年黎既廣告發展，同時刊登出呢年金帆獎（The Kam Fan award）得主。
呢個展覽既推廣海報就梗係正啦，重記得畢明所寫既《廣告死未》中寫到，每每有廣告界盛事，當中既宣傳海報一定夠大膽夠抵死，果然冇錯！今年呢個展覽就螺哂班高層上黎玩！實行高層落力省靚招牌！
當我一入到太古廣場，只見一排排既企牌，每排企牌都標明左廣告年份，６０年代既廣告一排，７０年代一排，８０年代又一排咁，廣告牌由舊至新一直伸延，由黑白變color print，由淺舊變新淨，真係半個鍾就睇哂香港廣告發展。 其中當然有大家都識既９３年MTR鬧鬼廣告，亦有發哥〞不在乎天長地久，只在乎曾經擁有〞既招牌口句。經典既亦有出前一丁當年新推出既附送麻油既公仔面、維他當年新產品營養麥精。 金帆獎得主更加名不虛傳！幽默感固然係有，寓意亦明顯！抵螺獎啦！例如Pizza Hut Halloween時期既廣告同埋Green Peace既保護動物廣告。
本來呢就影左好鬼多相既，點知個藍芽裝置壞鬼左，乜都上傳唔到喇…整到呢個entry咁鬼plain，同各位講個對唔住先！（不日將會有相補數）

• 《香港廣告商會五十年展》
• 日期：1-10/6（重有３日咋！要去就快手！）
• 地點：金鐘太古廣場（地鐵站直行就係個展覽場地啦）