《The Fairtrade Mark》

或者大家可能會對呢個logo感到陌生，不過唔使驚，葛佬同你介紹一下。
呢個係Fairtrade Labelling Organization (公平貿易組織)嘅logo。歐洲同美國人絕對已經習慣左呢個公仔，皆因佢地係超市買既大部份產品，都有呢個label。咁問題係呢個公仔有乜咁架勢呢？
其實FLO係一個由德國發起嘅志願團體，顧名思義，係為左公平貿易。大家要知道，果啲巨無霸級跨國財團，賺就賺到喊，壓搾程度亦係屈機，即係咁，例如StarBxxks賣一杯咖啡三十蚊，但係經過之前重重嘅轉手，最基本既咖啡豆農可能1%都賺唔到,即係3仙都冇。「乜話！？咁狗都有！？」係喇，就係咁狗。
FLO呢個團體就係為左保障最基層生產者免受壓搾而發起，自願參加既公司，要簽訂公平貿易組織既協議，唔單止原始收購價要高過一定標準，重要抽出買賣過程金額嘅1%作為收購地既基本建設費用。唔好睇少呢1%，各商各戶積積埋埋，夠起好多學校，道路，水電，醫院。
就咁睇落參加計劃既公司好似好傻仔，少左錢賺重要比人監住數簿。咁你就錯喇，係商業社會入面，品牌形象好重要，呢個FairTrade icon絕對係公平，良心形象既證明，大把良心市民睇住呢個logo黎買野，根據FLO公佈既數字，絕大部份加入計劃既公司利潤有多於15%既增長，賺到錢之餘又造福人群，咩叫面面雙羸？呢啲先係面面雙羸。