《死．懶．蟲》

開左學已經兩個禮拜喇，因為學園生活實在太忙，又學生會又社又英文學會，死人喇！所以呢排冇打blog，敬請見諒！
久別校園半年，個屎忽重未坐慣返學校啲硬堀堀但係又容易令人訓住嘅木櫈，不過根本冇時間比我地適應，皆因中六冇特定班房，逢轉堂都東頻西撲，每次都要坐落人地坐過重有陣屎忽除嘅木櫈，真係有份幾核突既感覺。間學校起左咁耐，校舍又係咁裝修，有錢不如起多幾個班房啦。
重有發現自己經過長年校園混沌虛渡既生活，自己隻耳仔不其然產生一道濾膜，一道專門隔住咪高風聲線既濾膜。無計，學校老師上堂鍾意用咪，而我上堂基本上都係到吽下吽下訓下訓下，慢慢已經完全無視個咪，（亦即係用咪講野我會更加唔理）害我學生會答問時間完全冇理到台下用咪高風發問既同學仔，幾驚問到我呀…

• 學生會內閣４５度閣成功當選，一連兩個禮拜緊迫既宣傳工作終於完成，好波好波。
• 因工事繁忙，科目進度完全追唔上，呢個星期六日又有野做，究竟幾時先有時間比我溫返好佢呢？