《巴同葛講》

尋日去完同琳慶祝完生日去影貼紙相，當中有段小插曲。
我地揀梗機既時候，有個巴藉人士拖住佢個細蚊仔行左埋黎，好急咁對住我講左幾句野，(點解咁多人同行係要同我講？)，當初重未搞清楚狀況，佢帶左我去部籃球機到指黎指去，神情好緊張，我問佢識唔識講英文，佢話得，但係口音太重唔明，迫於無奈下我叫左個服務員黎搞部機啦，可能食左錢，但係佢重好急咁同我講野，重苦苦哀求我唔知咩咁，最後我都係一面無奈無理佢，無計，雞同鴨講無得講。
而家返到黎諗返起其實件事好奇怪，我諗其實當中實係唔只jam錢咁簡單，想起果時佢有口難言，個樣又好急咁，究竟想點呢，而家諗落自己無幫到佢，都幾狗下。


(最後諗落可能佢想我幫佢玩籃球機)

















[巴同葛講] by 葛佬
3-8-2007

《不能改變》

人總係嫌呢樣唔好果樣唔好，邊個都係一樣。同樣地，我都係咁。
當我一出世，我無求乜野，因為我所見到既就係我所有既。當我漸漸長大，我見到既越黎越多，幼稚園生，小學生，中學生，職場…都經歷過。
職場上，我見識到非常富有既人，但係原來比起佢重富有既，亦大有人在，啲人可以多錢到你想像唔到，奈何自己同佢相差太遠，自己全身既千幾二千蚊，原來只係人地雞毛蒜皮冇左當跌左既野。中學階段，我見識到一啲好受歡迎既人，佢行去邊到都有朋友陪，佢可以好自在咁穿插各班各圈，都係受到歡迎，奈何自己就好似傻仔咁，只係一個去到邊都只會比人玩弄係鼓掌之中既傻仔。小學階段，我見到非常討好到老師既人，無論佢地亂咁搞破壞，老師都唔會罰佢，反之，自己學極都學唔到，反比人罵餐懞。幼稚園時期，我見到人地好玩得既爸爸，點解阿爸會同個仔玩得咁fd既？我諗極都諗唔明。

人越細，睇既野越簡單表面，人越大，睇既野越係複雜。

當大個左之後，發覺我之前既疑惑原來全部係自己既、先天既缺憾，我冇一個關心人既爸爸，我唔係一個得人鍾意既人，我唔係一個受歡迎既人，我唔係有錢既人，我積極咁想改變自己，想改變環境，但係點解我永遠都唔成功？我好想好似林燁咁，點解，點解佢可以含住金鎖匙出世？點解佢可以咁得老師同學朋友鍾意？點解佢咁受歡迎？因為佢風趣幽默？因為佢高大威猛？因為佢笑容可嘉？點解，由中四認識佢開始，我好羨慕佢，佢每樣野我都好妒忌，幾年黎，我積極咁學習佢、模仿佢，我學佢搞爛gag，學佢扮低b，學佢既笑容，但係點解我學極都學唔到佢？反而引黎反效果！？唉。

《天使》

人地話每個人心目中都實有個夢想中既天使，點解我冇既？究竟幾時先出現？





[Angel] By 葛佬
22-7-2007

唔好睇幅野簡簡單單咁，幅畫加加埋埋用左十幾粒鍾畫，最麻煩係啲石碑上面既細字，真係畫死人。

《Japanese Commercial》

"While waiting to meet her friends outside of a Louis Vuitton store, Aya's cell phone is eaten by the LV Panda, who then promptly swallows Aya - but the inside of his stomach is gateway to a psychadelic wonderland. Based on characters created by famed superflat artist Takashi Murakami."
呢個cm係由LV日本所製作，眼精既讀書或者已經發覺到套野畫風好似邊到睇過咁。無錯，人物指導就係數碼暴龍既人物設計師Takashi Murakami。要令到一樣商品表現地道，的確要令到觀者聯想到”有關日本”。LV搵黎Takashi氏絕對係明智之選。

成套野一句野都冇講過，全部由音樂同畫面表達信息。畫面上表現”現實”既一幕背景同路人使用暗色系，突顯出LV Panda同埋小女孩Aya，同時背景音樂調皮逗趣，當LV Panda嚥下Aya，背景音樂既bass立即加強，真係合埋眼都感覺到入左去wonderland。跟住一連串既表現亦令人覺得同電影《千與千尋》有異曲同工之妙(因為個feel?)。

個cm係幾得意，但係諗落諗落就真係唔明LV整呢個cm既目的，難道想轉移目標客群到細路仔到！？大佬，我唔想行街都見到靚妹揹LV monogram呀。

《朋友，我當你一世朋友》

友情，有時真係好脆弱，由其當你認為好堅固果陣…
其實我都唔想事情發生成咁…我由心同你地講對唔住…真係好對唔住。
我都知自己衰仔架喇，不過我唔想咁樣就冇左你地兩個fd…我地識左咁多年，唔希望因為呢啲事而關係缺裂。請原諒我啦。

《最佳損友》

朋友　你試過將我營救
朋友　你試過把我批鬥
無法　再與你交心聯手
畢竟　難得　有過最佳損友

幅畫岩岩畫，都幾代表到而家心情。

[Sadness] By 葛佬
18-7-2007

《無題》

阿King比我果枝試用版暗瘡膏明明得10ml，竟然比我唧足半年都重有得唧。你話勁唔勁先。

《變臉》

原來，唔同既外觀比人既感覺真係好唔同。重記得謝師宴之前，我重係一個薯頭look，一餅頭髮，一副激巨型粗框眼鏡，個個未識我都話我係乖仔，斯文，甚至考順，叻仔，讀得書…（吹漲）。之後我轉左個樣，留長左頭髮，染左少少啡，配左con，釘左兩個耳窿。當自己諗住自己好睇左既時候，原來自己比人既印象係可其差…呢排識左啲新朋友，從佢地口中先得知原來我比人既感覺係唔讀書，無野做，唔正經。唉，估唔到，上個月重比人咁讚，估唔到而家…一個人既樣，真係可以比人唔同感覺。各位暑假希望轉轉look既朋友，重新考慮下先啦。

《失眠》

再一次地，我又失眠了，還差五分鍾就淩晨四時了。
或者我發現了幾次失眠既共通之處：茶左咩保濕中和液黎訓覺。

《PTU》看後感

先講明，我睇既呢套PTU並唔係而家播緊果套學警出更，而係數年前杜師傅既電影作品。

先旨聲明，套片非常奇特，但係個feel，我好鬼鍾意。成套片，就發生係一個晚上，亦即係話整套片都係黑媽媽咁。故事開始於一間餐廳，肥沙同馬尾既巧遇，跟住再到肥沙比馬尾既靚仔搞失槍，就由呢到開始，一系列既事件就巧妙咁串聯埋一齊，馬尾之死，重案阿姐摷肥沙，任Sir幫搵槍，禿頭搵大眼，重有．．．偷錢細路仔。總括而言，呢套片主要唔係睇槍戰，唔係睇黑幫，係睇杜sir點樣咁神奇咁將事件扣埋一齊。雖然故事大鋼有D奇怪，但就充滿個人風格，睇落唔悶反而有隻莫名既刺激感，同時亦充分表現左香港罪惡同不安既一面（禿頭私刑房太震撼，有一種不寒而慄既感覺）。

最值得一提既係套戲既燈光運用，可見好多場境只係由一盞燈所投射，所得既效果非常不俗，絕對係營造到一種懸疑神秘既感覺，無論係後巷，橫街，大路，樓梯，都比到一種”突然有野殺出”既感覺。

唔知呢套片算唔算歸類為近年既警匪商業片啦，我剩係知道杜sir稱佢為”個人作品”，杜師傅果然寸得起。總而言之，呢部戲葛佬推介大家睇睇！

快樂的秘密

人們最想由生命中獲得什麼? 你最常得到的答案是:我只要快樂! 既然每個人都想得到快樂，為何卻總是事與願違? 為什麼製藥廠成長最快的是抗鬱劑? 為什麼認為自己快樂的人少之又少? 有可能是因為我們在尋覓的過程中走錯了方向嗎?

瀏覽論壇時見到這題目,我copy左一段post出來...因為
這個階段、這個時刻、這段日子...
我們身邊返學的、返工的、或是無所事事的朋友...
似乎都不快樂...
到底我們點解會不快樂呢??