《啟示》

呢篇將會係一篇好長好長嘅文字… 　

科學家話，發夢因神經緊張，精神失衡，思緒皺亂，我諗係真嘅。 我相信夢有啟示，因為夢境不遺餘力地顯露你自己真正嘅想法，而真正既想法，只有自己知道。點解要喺呢種神情繃緊嘅情況下發夢呢？我諗，係因為做物者想係人類最無助嘅時候，得到啟示。

十一點，我往床上一攤就睡。
沒有夢境，我很舒服，因為腦部連運轉都懶了。

二點幾，我聽到爸爸媽媽嘈交嘅聲音，我每聽到媽咪飲泣一次，我個心就俾刀插一次。媽咪失控地叫了一聲，我忍唔住了，開了房門，走近媽媽，坐低，摸著她膊頭，安撫，擦淚水。
幾分鐘後，我又返到床上了，心入面揑住揑住，但亦抵抗不住睡魔，「好眼訓…」，懷住咁嘅心情，再次睡著了…

＞
我係深圳嘅地鐵站入面，我攞住履歷紙，我要見工？係，我要見工。 深圳、大陸比我嘅感覺就係灰暗、骯髒，呢到都一樣，我四處尋覓，但連目標人物都唔知係邊個。地鐵站入面四周冇人，黑暗，疏落… 可能我因為久覓不果，我心灰咁攤係地鐵站嘅床上面(？)，望出鐵框窗外，見到好多扒手，偷完一次，又一次…突然，我見到李嘉豪，劉嘉添，學校玩嘢嘅朋友們，我就好似平時一樣，將我睇到嘅嘢，復述一次。

＞
好灰，突然好灰，我係地鐵站床上頹廢地滾下來，我係夢入面見到你，我見到你，但乜嘢都無講，就對你上下其手，好似絕望嘅失業漢，返到屋企對妻子洩慾一樣，這是男人野獸的一面嗎？我知道你絕對唔鍾意咁樣，你那些安詳嘅感覺失去了，但係我冇停手(fuck!!)，你羞怒起來，不發一言，走出屋外(變回屋企了??)，我知道做錯了，很想拖回你隻手，補救，但你沒有理我，在你回家的路上，我跟在後面，不斷為自己辯護，而果條路很邏輯地係由我家去你家的路途，好真實…

＞
我又轉地方了，連自己的身份也調轉了，我知道夢中的人唔係葛佬，係一個band3學生喺間band3學校做錯左事，我係學校打死左一個學生，我係頂樓為左拒絕追捕，跑呀跑，走呀走，幾經辛苦走過防火走廊，跳，衝，跑，最後我跨過了圍欄，跑出了學校，卻撞正肥斯大隻警察嘅胸膛，拜服了。呢個夢好似無乜意思，是夢的轉折位嗎？


＞
又轉地方了，我化身成一個功夫了得，神態自若的刺客。係一個日式嘅紫禁城入面，我縱橫跑跳，目的係闖入大殿，殺死皇帝。我飛馳的路途中，有很多持長矛嘅兵卒，我不費吹灰之力就斬斷了他們手上嘅武器，簡單之極，完全玩弄在我鼓掌之中。我闖入了大殿，大殿裡全部面孔都似曾相識，全是班裡同學的面容，那裡似乎在舉行重要的宴會儀式，但係我冇理會，我懷著興奮玩弄嘅心情，斬斷兵卒的武器，劈斷佢地嘅桌椅吊燈，翻轉裡頭嘅裝飾，就好似一個野蠻嘅細路，持住自己唔會比人罵，四處叫囂破壞一樣，突然一把熟悉的聲線說著：「你！你玩夠未？你好煩呀！我地有嘢做呀！」，呢種語氣，呢種聲音，果然好熟悉，多年前討厭嘅我，幾乎日日都聽到呢句嘢，無理人感受，胡亂擺佈。我表現不屑，心裡面大概諗梗「車，唔玩咪唔玩囉。」哼的一聲，把長劍架在頸上，斯的一聲，了結了自己的生命，很隨便地。

＞
我死了，係果一刻，我感到好安詳，唔通因為死後嘅世界都係安詳的？
我明白自己死了，張開雙眼的一刻，卻又是熟悉的景象，回到現代，回到我的房間裡。感覺很真實，我感覺到自己係天堂或地獄，我開電腦，開msn，慣常地顯示為離線，睇住啲朋友上線下線，佢地無提起過我，無人顧念我，因為我死前係大殿上做嘅嘢實在太克人憎？我緩步走出客廳，卻不是熟悉的客廳，很窄的，我見到葉sir，我見到葉sir同班上幾個好熟悉嘅同學係到不慌不忙咁食早餐，我明白果幾個同學都死左，只係唔知死因。而葉sir亦做返老師嘅角色，我知佢無死，只係喺呢個空間領導住我地呢幾個死去嘅人，我問佢：「呢度係天堂定地獄？」，佢叉住舊腸仔，又係不慌忙咁講：「根本就無天堂地獄，呢啲只係一啲人想像出黎嘅地方。」以我呢個無神論者黎講，呢個夢入面嘅解釋好得我同意，我冇追問，坐低一齊食早餐，係果一刻，雙眼有啲白朦矇，心入面卻好安詳好安詳。
葉sir開口講嘢喇，「而家八點半，你地有一日時間」我懶醒咁話「九點半開始？」，但係其實我重未知要做乜，佢回應左我，再講「你地喺呢一日，係靈魂同肉身嘅轉折位，你可以做你鍾意做嘅嘢，而你地今日可以搵你值得搵嘅人，同佢親吻

咁樣你就會一下醒來

就可以成功轉世了。」佢再講：「平常人睇唔到你地，如果你想現身，就合埋眼，講『開眼』，反之就講『閉眼』。」
好有趣，好似打梗機咁，又好似睇梗多啦ａ夢咁，好鬼有趣。

間屋係朗屏果邊，場景有啲怪，我諗個夢刻意令我對環境似係熟悉又似係唔熟悉。
可能因為我係半人鬼，我可以係空中滑翔，飛左好耐好耐，終於到達基朗，終於到達學校。

我第一時間竟然想去搵一啲無關痛癢嘅女仔，想去嚇一嚇佢地，玩一玩佢地，正如係平時係學校，我鍾意受女仔歡迎果種感覺，我鍾意女仔見到我嘅表情動作一樣，我要去搵佢地。
係學校徘徊，我搵唔到佢地，反而睇返學校嘅全部同學，無人為我傷心，無人提起我，恍惚我是生是死都無影響，無人覺得我重要…
但係我繼續係學校搵人，懷住輕佻嘅心情，似係想去調戲良家婦女咁。

我走到學校後花園，見到好多人，個個係到各自各傾計，我冇現身，佢地見到我唔到。突然，我又見到你，我係呢個夢入面，再次地見到你，當個個人都傾計傾得好興起之際，我見到你表情好呆滯，望住遠空，我感覺到，你顧念梗我，你果一刻真係好木獨。我好想同你講返清楚今晚啲嘢，好想同你道歉，好想好想。你坐係你最fd嘅朋友身邊，但係佢無理到你，佢同佢對面嘅fd旁若無人咁傾計，我就慢慢坐係你對面，觀察住你嘅容貌，我想玩一玩你，我合埋雙眼，雙眼一黑間我講「開眼」，我聽到好熟悉嘅一句「Scott!」，好熟悉好熟悉，同係電話上面經常聽到嘅一樣，我好開心，而我見到你個樣好興奮，接著我又即刻合埋雙眼，再講一句「閉眼」，我腑身向前，親向你的嘴唇，我合埋左雙眼，我見唔到你，你果一刻都見唔到我，我知道你係我要搵嘅人，不知不覺間就即刻親左落去…
…
…
…


＞
我腦海命令我立即醒來！因為我知道呢個係夢境！一定係夢境！我真係好似拍戲咁，真係嘗試揑一揑自己手掌，呼，真係返到現實了，喺夢中，恍惚睡著了的每一分每一秒也在慢慢渡過，係令一個地方慢慢過日子似的，如現實如虛幻，疑幻疑真，真假都差啲分唔出了，我醒來係因為我知道之前係夢境，我明白到其實自己係到諗梗邊個。腦海中有啲混亂，但係果種安詳嘅感覺沒有散去，我好開心我重活著，我重繼續梗我嘅生命。

(感謝你！)